Հունիսին համաշխարհային ֆինանսական շուկաներում դիտվեց խառը դինամիկա։ 

Ներդրողների ուշադրությունը կենտրոնացած էր գնաճային սպասումների մեղմացման, կենտրոնական բանկերի դրամավարկային քաղաքականության և աշխարհաքաղաքական ռիսկերի նվազման վրա։ 

Պետական պարտատոմսեր․ Զարգացած և զարգացող շուկաների պետական պարտատոմսերը հունիսին արձանագրեցին չափավոր դրական արդյունք։ Նավթի գների նվազման պայմաններում գնաճային սպասումների մեղմացումը նպաստեց շուկայի կայունացմանը, թեև կենտրոնական բանկերը շարունակեցին պահպանել զգուշավոր դիրքորոշում։  

ՀՀ պետական պարտատոմսերի եկամտաբերության կորը ցուցաբերեց տարաբնույթ շարժ։ Կարճաժամկետ հատվածում (մինչև 1 տարի) եկամտաբերություններն որոշակիորեն աճեցին, ինչը պայմանավորված էր Կենտրոնական բանկի կողմից վերաֆինանսավորման տոկոսադրույքի անփոփոխ պահպանմամբ և շուկայի կողմից դրամավարկային քաղաքականության մեղմացման սպասումների ավելի աստիճանական տեմպերի վերագնահատմամբ։ Միևնույն ժամանակ միջին և երկարաժամկետ պարտատոմսերի նկատմամբ պահպանվող օտարերկրյա և տեղական ներդրողների պահանջարկը նպաստեց այդ հատվածում եկամտաբերությունների նվազմանը։     

Կորպորատիվ պարտատոմսերի շուկաներում պահպանվեց դրական տրամադրությունը։ Եվրոպական ներդրումային դասի և բարձր եկամտաբերության պարտատոմսերը գերազանցեցին ամերիկյան համարժեքներին՝ կրեդիտային սպրեդների նեղացման և ներդրողների կայուն պահանջարկի պայմաններում։  

Ֆոնդում ավելացրել ենք ՀՀ կորպորատիվ պարտատոմսերի կշիռը՝ 12․2%-ից մինչև 12․6%։  

Արժութային շուկա․ ՀՀ դրամն արժևորվել  է ԱՄՆ դոլարի, եվրոյի և բրիտանական ֆունտի նկատմամբ՝ համապատասխանաբար 0.1% , 2.2% և 1․4%-ով։

Ֆոնդի արտարժութային կառուցվածքում էական փոփոխություններ տեղի չեն ունեցել։

Հունիսին ֆոնդի եկամտաբերությունը կազմել է 0.54%։ Եկամտաբերությանը ամենամեծ դրական նպաստումն ունեցել են ՀՀ ներդրումները, մինչդեռ արտասահմանյան ներդրումները բացասաբար են ազդել եկամտաբերությանը։