Սեպտեմբերին համաշխարհային ֆինանսական շուկաներում գերակշռեց բացասական դինամիկան։ Շուկաների վրա ազդեցություն ունեցան խոշոր կենտրոնական բանկերի կողմից դրամավարկային քաղաքականության խստացումը, պարտատոմսերի եկամտաբերությունների և էներգակիրների գների կտրուկ աճը։

Բաժնետոմսեր

ԱՄՆ-ի, Եվրոպայի և զարգացող երկրների բաժնետոմսերի շուկաները հիմնականում նվազեցին՝ բարձր տոկոսադրույքների և գնաճային ռիսկերի վերագնահատման պայմաններում։ Իսկ Չինաստանում հայտարարված տնտեսական խթանման նոր միջոցառումները չկարողացան էականորեն բարելավել ներդրողների տրամադրությունները՝ ներքին կառուցվածքային թույլ պահանջարկի պատճառով։ Միևնույն ժամանակ, ճապոնական շուկան, հակառակ ընդհանուր միտմանը, գրանցեց չափավոր աճ։ 

Հաշվի առնելով շուկայական պայմաններն ու մեր սպասումները՝ ֆոնդում կրճատել ենք արտասահմանյան բաժնետոմսերի կշիռը՝ 26․6%-ից մինչև 25.6%:  

Պարտատոմսեր

ԱՄՆ Դաշնային պահուստի, Եվրոպական և Ճապոնական կենտրոնական բանկերի կողմից տոկոսադրույքների բարձրացումը և գնաճային ռիսկերի պահպանումը բացասաբար անդրադարձան զարգացած շուկաների պետական պարտատոմսերի շուկաների վրա։ Հատկապես, արտահայտված էր ԱՄՆ գանձապետական պարտատոմսերի վաճառքը։

Կորպորատիվ պարտատոմսերի շուկաներում աճել են ներդրողների կողմից պահանջվող ռիսկի հավելավճարները (risk premium)՝ հատկապես առավել ցածր վարկանիշ ունեցող բարձր եկամտաբերությամբ պարտատոմսերի դեպքում։ Բարձր տոկոսադրույքները և տնտեսական հեռանկարների շուրջ անորոշությունը մեծացրել են ներդրողների զգուշավորությունը։

ՀՀ պետական պարտատոմսերի շուկայում  նույնպես եկամտաբերություններն աճել են կորի ողջ երկայնքով՝ պայմանավորված բարձր գնաճային սպասումներով և ՀՀ ԿԲ դրամավարկային քաղաքականության խստացմամբ։

Այս պայմանները հաշվի առնելով՝ ֆոնդում ավելացրել ենք ավանդների (25%-ից մինչև 25․7%) և արտասահմանյան դրամական շուկայի գործիքների (0․8%-ից մինչև 1․8%)  կշիռները:  

Արժութային շուկա․ Տոկոսադրույքների բարձրացման և ԱՄՆ պետական պարտատոմսերի եկամտաբերությունների աճի ֆոնին՝ սեպտեմբերին ԱՄՆ դոլարն ամրապնդվեց հիմնական արժույթների նկատմամբ։ Եվրոն, բրիտանական ֆունտը և ճապոնական իենը թուլացան դոլարի նկատմամբ։ 

Մինչդեռ Հայաստանը շարունակում է կրել արտարժույթի զգալի ներհոսքի ազդեցությունը։ Այս պայմաններում, չնայած ՀՀ ԿԲ կողմից պարբերաբար իրականացվող արտարժույթի գնման գործարքներին, ՀՀ դրամը շարունակել է արժևորվել ԱՄՆ դոլարի նկատմամբ՝ 0.4%-ով։ 

Ֆոնդում արտարժութային ակտիվների կշռի նվազումը՝ 35․5%-ից մինչև 34.7%, պայմանավորված էր դրամական միջոցների ներհոսքով և շուկայի ազդեցությամբ։

Սեպտեմբերին ֆոնդի եկամտաբերությունը կազմել է -0․99%։ Թե՛ տեղական, թե՛ արտասահմանյան ներդրումները հիմնականում բացասաբար են ազդել եկամտաբերության վրա, ընդ որում՝ հիմնական բացասական գործոնը եղել է արտասահմանյան հատվածը։ ՀՀ կորպորատիվ պարտատոմսերի և ավանդների դրական եկամտաբերությունը մասամբ մեղմել է անկումը։