Մարտին Մերձավոր Արևելքում լարվածության սրումը հանգեցրեց գլոբալ շուկաների կողմից աշխարհաքաղաքական ռիսկերի կտրուկ վերագնահատման։ Տարեսկզբի դրական միտումներն արագորեն չեզոքացվեցին՝ հանգեցնելով նավթի և գազի գների կտրուկ աճի, գնաճային սպասումների վերակենդանացման և տարբեր շուկաներում ակտիվների զանգվածային վաճառքի։ 

Մարտը բարդ շրջան էր շուկաների համար․ ճնշման տակ հայտնվեցին ինչպես բաժնետոմսերը, այնպես էլ պետական պարտատոմսերը, մինչդեռ ապրանքային շուկաները հանդես եկան որպես ակնհայտ հաղթող։ Այս աշխարհաքաղաքական շոկն օբյեկտիվորեն փոխել է շուկայի դինամիկան, ինչի հետևանքով դիվերսիֆիկացիայի դասական մեխանիզմները չեզոքացվեցին, իսկ կիրառվող ռազմավարությունները ենթարկվեցին գլոբալ ճնշումների անխուսափելի ազդեցությանը։ 

Բաժնետոմսեր. Բաժնետոմսերի շուկաներում դիտվել է համատարած անկում՝ պայմանավորված նավթի գների կտրուկ աճով և դրա հետևանքով գլոբալ տնտեսության համար ստագֆլացիոն ռիսկերի ուժեղացմամբ։ ԱՄՆ բաժնետոմսերը նվազել են, սակայն ցուցաբերել են համեմատաբար ավելի բարձր դիմացկունություն՝ մյուս զարգացած շուկաների համեմատ։ Մեծ Բրիտանիայի շուկայի անկումը մասամբ մեղմվել է վերջինիս ապրանքային ուղղվածության շնորհիվ։

Եվրոպայում անկումն առավել արտահայտված էր՝ աճի հեռանկարների վատթարացման և էներգակիրների բարձր գների ֆոնին, ինչն արտացոլվել է տարածաշրջանի լայնածավալ բացասական արդյունքներում։

Ճապոնիայում նույնպես արձանագրվել է խորը անկում՝ ներդրողների կողմից շահույթի ֆիքսման հետևանքով։ Զարգացող շուկաները ևս ցուցաբերել են թույլ արդյունքներ, հիմնականում ասիական շուկաների անկման ազդեցությամբ։

Պետական պարտատոմսեր․ Զարգացած երկրների պետական պարտատոմսերը գրանցել են բացասական եկամտաբերություն՝ պայմանավորված գնաճային սպասումների աճով և կենտրոնական բանկերի ավելի կոշտ քաղաքականության սպասումներով։ ԱՄՆ շուկան ցուցաբերել է հարաբերական դիմացկունություն՝ ի տարբերություն Եվրոպայի, որտեղ եկամտաբերությունների աճը և կենտրոնական բանկի խստացման ազդակները հանգեցրել են առավել արտահայտված ճնշման։ 

Կորպորատիվ պարտատոմսեր. Կորպորատիվ պարտքի շուկայում դիտվել է ռիսկերի վերագնահատում՝ արտահայտված սպրեդների ընդլայնմամբ, հատկապես Եվրոպայում՝ թե՛ ներդրումային մակարդակի (investment grade), թե՛ բարձր եկամտաբերության (high yield) հատվածներում։ 

Հաշվի առնելով շուկայական պայմանները ու մեր կանխատեսումները՝ ֆոնդում ավելացրել ենք արտասահմանյան դրամական շուկայի ֆոնդերի կշիռը։ Արտասահմանյան բաժնետոմսերի կշիռը նվազել է 35․1%-ից մինչև 32․6%՝ պայմանավորված դրամական միջոցների ներհոսքով և շուկայի ազդեցությամբ։  

Մերձավոր Արևելքի իրադարձություններով պայմանավորված՝ մարտին տեղական ֆինանսական շուկայում ՀՀ պետական պարտատոմսերի եկամտաբերության միջնաժամկետ և երկարաժամկետ հատվածներում կորը տեղաշարժվել է վերևի ուղղությամբ, ինչը ևս բացասական ազդեցություն է ունեցել ֆոնդի եկամտաբերության վրա։ 

Տեղական ներդրումներում ավելացրել ենք ավանդների կշիռը 24․2%-ից մինչև 24․8%։

Արժույթի շուկայում ՀՀ դրամն արժևորվել է եվրոյի և բրիտանական ֆունտի նկատմամբ՝ համապատասխանաբար 2.83% և 1.99% -ով, մինչդեռ ԱՄՆ դոլար/ՀՀ դրամ փոխարժեքը գրեթե անփոփոխ է մնացել:

Ֆոնդում արտարժութային ակտիվների կշռի նվազումը (35.3%-ից մինչև 34․2%) պայմանավորված է դրամական միջոցների ներհոսքով։

Մարտին ֆոնդի եկամտաբերությունը կազմել է -3․5%՝ պայմանավորված արտասահմանյան ներդրումների և տեղական պետական պարտատոմսերի գների անկմամբ։